Captain Phillips (2013)

Þann 8. apríl árið 2009 rændu sómalskir sjóræningjar bandaríska flutningaskipinu MV Maersk Alabama og hugðust nota bæði skipið og áhöfnina til að kúga fé út úr eigendunum. Richard Phillips var skipstjóri á Maersk Alabama þegar þetta gerðist og skrifaði hann í kjölfarið bók um þennan atburð sem myndin Captain Phillips er gerð eftir. Það er Tom Hanks sem leikur Phillips en myndin er í leikstjórn Pauls Greengrass sem gerði m.a. myndirnar Green Zone, The Bourne Ultimatum og Bloody Sunday. Aðeins degi fyrir ránið á Maersk Alabama hafði áhöfn skipsins æft viðbrögð við slíku sjóráni og tókst að varna því að hinir sómölsku sjóræningjar næðu að sigla skipinu í land. Hins vegar tóku þeir skipstjórann, Phillips, í gíslingu og flýðu síðan með hann frá borði í sérútbúnum björgunarbáti. Við tók nokkurra daga háspennueftirför þar sem óhætt er að segja að líf skipstjórans hafi hangið á bláþræði enda hótuðu sjóræningjarnir stöðugt að taka hann af lífi ef árás yrði gerð á bátinn. En til einhverra ráða varð þó að grípa því ef sjóræningjarnir næðu til lands á bátnum þá yrði þeim ekki skotaskuld úr því að láta sig og gísl sinn hverfa og við það gátu Bandaríkjamenn ekki sætt sig ...