Kramer vs. Kramer (1979)

Hádramatísk og einkar áhrifarík frásögn af manni sem verður allt í einu að sjá einn um ungan son sinn þegar eiginkonan fer að heiman dauðþreytt á sambandsleysinu í hjónabandinu og berjast síðan við hana um yfirráðaréttinn yfir stráknum. Áttföld óskarsverðlaunamynd sem tekur sérlega skynsamlega á viðkvæmu efni og eldist lítt með tímanum því innihaldið getur ávallt átt við. Dustin Hoffman og Meryl Streep fengu bæði óskarsverðlaunin fyrir stórgóðan leik sinn. Þau eru alveg hreint stórkostleg í hlutverkum Kramer-hjónanna og vinna þau bæði samúð áhorfandans í klemmu sem oft er svo erfitt að leysa farsællega. Sterk mynd, innileg, rík af tilfinningum og full af góðum boðskap. Hún er algerlega laus við lélega og hreint óþolandi væmni sem oft er að finna í svipuðum myndum. Ég gef Kramer vs. Kramer tvímælalaust fjórar stjörnur og mæli eindregið með henni við alla þá sem hafa gaman af klassískum og stórkostlegum kvikmyndum með sannan boðskap!