Kvikmyndaklúbburinn Svartir sunnudagar, sem á sér heimili í Bíó Paradís við Hverfisgötu, fer aftur af stað nú um þessa helgi. Fyrsta mynd vetrarins er Videodrome eftir hrollvekjumeistarann David Cronenberg, en myndin verður sýnd á DCP í bestu mögulegu hljóð- og myndgæðum, samkvæmt tilkynningu frá klúbbnum.
Videodrome er súrealísk útfærsla á hugmyndinni um hvernig áhrif fjölmiðlar hafa á líf fólks.
Aðstandendur klúbbsins Hugleikur Dagsson, Sigurjón Kjartans og Sjón hafa sett saman „rosa“ metnaðarfullt prógramm fyrir veturinn og „það verður alltaf eitthvað geggjað á hverjum sunnudegi“, eins og Reynir Berg Þorvaldson hjá Bíó Paradís orðar það.
Svartir Sunnudagar einbeita sér að kult- og klassískum bíómyndum og sýningar munu verða vikulega í vetur á sunnudagskvöldum kl. 20 í Bíó Paradís.
„Síðasti vetur gekk vonum framar, þar sem fjöldinn allur mætti á mjög fjölbreytta og beitta dagskrá sem í boði var. Í hverri viku sér nýr listamaður um plakatahönnun Svartra Sunnudaga, og er sölusýning þeirra plakata síðastliðins veturs aðgengileg í innra rými Bíó Paradís. Fyrir þeim félögum vakir að auðga bíómenningu borgarinnar og njóta lífsgæðanna sem felast í því að klassískar kult myndir séu sýndar í reykvískum bíósal a.m.k. einu sinni í viku.“
